Sa Pagkabuntis ng Buslo ni Damaso

Itago mo Damaso
sa iyong Condo yunit sa forbes
o sa Mansion sa Makati
o sa sariling Bangkong naitayo
maingat mong itago
 ilang mga buslo
na idinedeposito sa simbahan
ng mga nauuto mong kordero
iyang tangang buslong kumakalansing
mga perang kusing
mga salaping maningning
na pinupuno araw-araw, linggo-linggo
ng libo-libong katao
ng di mabilang mong deboto
sina Juana't Juang nangagsisitango
sa mga sitas mo't pang-uuto

Damaso, Ipagkatago-tago mo
sa likod ng iyong santo-santo
at ipagdasal na rin
huwag nawang matanaw
ni mapadungaw
sa iyong kabang yaman
silang kapwa mo magnanakaw...
baka mangagsisi sa huli
baul ng kayamanan
biglang mangalahati

Nanganganib pa naman
mga lahing saserdote
kauring obispo't mga prayle
sa termino ng nakadilaw na ginoo
hayang natutong mang-isnab
sa inyong banal na payo
hayang abolisyon con todo
sa pagbabawal niyo't mando
natutong iitsapwera
ang payo mong metodo kalendaryo

Naku! Damaso, papaano ang buslo
kung kompresor iyang balak
ng itinuturing na apo
pigilan ba namang dumami ang tao
paano na kaya lalago
mga desipulong tagapuno
ng iyong mga buslo
paano mananatili
sa iyong poder ang mga nauuto
kung maaadik sila sa langit
na hatid ng mga condom,
kung sa bawat kadyot
nasusupot mga anghel
na biyaya ng may kapal
masasayang ang pinaglalawayan mong kupal
taling hindi na mapipigtal
hingal lang nang hingal
hangal!

Damaso! Damaso!
kung ikaw na'y kuntento
sa paghalinghing sa banyo
itong RH bill ay hindi para sayo...
kung ikaw ang lalamas
sa suso ng tigang na lupa
kung ikaw ang mag-aalab
sa dampa ng mga abang naglalaro ng baga
kung ikaw ang makapipigil
sa pagdami ng mga tuta
sige!tahol!
tumahol ka nang pagtutol

Ngunit, lumulobo ang mundo, Damaso!
at hindi sapat ang basbas mo
sa nagbabanal-banalang mga kordero
di nila makakain mga sitas mo't payo
di pa ba sapat
sayo ang ganito
wala ka nang upa sa lupa
pati langit ng iba
sasagpangin mo!
huwag kang masyadong swapang Damaso!
mapupuno parin naman
 iyong mga buslo

huwag ka lang titigil 

sa pang-uuto.

Sa Pasimula ay ang Wika...

sa pasimula ay salita

oh! makapangyarihang wika

ginagahasa nang walang habas

ng mga pinagpala

instrumento ng kanilang pandurugas

nilalaspag sa kanilang mga dila

waging pinagpipitagan

maging titulo-panigurado ng mga walanghiya

nililiha ng mga makakapal ang mukha...

Mula sa hanay ng mahahabang upuan

Narinig ko ang tunog bakal na kadena

nakagapos sa leeg ng banal na libro

hawak-hawak ng naka-abitong

nagtatalumpati sa pulpito

waring sinasaniban

nina Birgil at Horacio

o ni Cicerong orator  sa kanto ng

Santo Romano Avenue...

tinakpan ko aking tenga

nang hindi na muling marinig

ang paraan ng panggagahasa niya

sa pinabubuting balita...

ngunit, biglang nahagap ng aking ilong

samyo ng kalis

ayoko nang alamin

kung laman nito ay dugo

na umaalingasaw sa pagpapanggap...

tinakpan ko aking ilong

ngunit, napansin ko bigla

si Poncio Abitong may krus sa noo 

na nakatayo sa pulpito

at sa likod niya ang isang demonyo

na bumubulong

ng tamang paraan ng sermon at turo

KRISTONG ENHINYERO

lahat ay naganap
nang naaayon sa plano...

Isang malaking bangungot
ng pagpapanggap
lulan ng nakagigimbal na lohika
ng henyong ganap...

ang huwad na pagpako sa mga palad

Banal na Abo

Bukas ang bintana , kayat malayang naglalagos ang malamyang hanging pang hating gabi sa sa isang kabahayang puno  ng mga santo. Iba't ibang hugis, laki, bigat, hitsura ng mga niluluhurang banal na kahoy. Mula sa banal na kamay na umukit nito: may Santa Mariang mula sa banal na sicamorro; Santa Fe na mula sa mahogany na nakuha pa sa banal na kabundukan ng Trala-la; Santa Maria Magdalena mula sa punong hindi pa napapangalanan; ang maliit na banal na Nazarenong gawa naman sa tsok -na hindi mauuri bilang banal, pero dahil pinangalanan ay banal na rin; Santo Antonio na mula pa sa isang matandang paring Dominikano noong panahon pa ni Rizal; at may mga marmol ding banal. Isa si Santo Niñong puno ng mga beads ang nangingintab na damit. Sinulsi ito ng mga deboto sa Parokya ng Kristong Banal Church. Tangan ang Krus at koronang kulay ginto sa kaliwang kamay ng Santo Niñong naghihimala raw tuwing magiging kulay asul ang itim nitong mga mata; At marami pa.


 Ang ilan ay magkakasama sa banal na altar. Isang lamesang laging may haing kakanin at arnibal at hindi pinapatiran ng pagtirik ng kandila. Araw-araw may nakatakdang magtirik ng kandila rito at magdadasal ng Ave Maria nang tatlong beses ang sinumang hindi tutupad sa kanyang takdang tungkulin.  


                    Ngunit nang gabing iyon, bukas ang bintana. Humihip nang malakas ang hanging mabilis naglagos sa buong banal na lugar. Natatangay ang bagong labang kurtina ng bintana, hanggang napalapit sa pakalahati ng kandila. Napadikit. Matutumba ang kandila at mabilis na kakapit sa tela ng damit ng mga banal na santo. kakalat sa bagong labang kurtina. Gagapang sa kabuuan ng bahay. Ilang banal na kahoy na ang nagliliyab. Naglalagablab. Natutupok na dahil sa kandilang kanina naman ay malamlam ang pagtanglaw ngunit biglang lumikha ng nakasisilaw na liwanag.


Ang paglitaw ng nakasisilaw na silahis na madaling tutupok ng buong banal na lugar na iyon. kabilang ang ilang banal na kahoy na sa malao't madali ay magiging banal na abo na.


Amen.

Ave Maria, Ave Maria

Ave Maria, Ave Maria

Pitong santo sa altar

May kandilang tumatanglaw

 Rosaryo sa kamay

“Ave Maria.. Ave Maria…”

Taimtim ang pagdarasal

Ni aleng Bebe

Nang bigla siyang napatayo at napasigaw

“Putang ina niyo!Nagdarasal ako!!

Ang iingay ng mga letseng bata ito!”

At mabilis na tumakbo

Palayo

Ang mga bata

Papunta sa simbahan

Ave Maria, Ave Maria

Magpupunas ng uling sa mukha

Maglalagay ng lata

At saka hihilata

Palad ay ilalahad sa madla

Padaan si Konggresman

Maglalabas ng makapal na pitaka

Magmamasid sa paligid

Wala pang taong makakakita

Maghihintay muna

Na mapalingon ang mga kababayang magsisimba
Ave Maria, Ave Maria

Kaya’t inihulog niya

Papel na pera

Sa lata ng gusgusing bata

Napangisi siya nang maalala

Ang balota

At umpisa na ang misa

Hindi pari mapakali

Sa paglingon ang isang binata

Ave Maria, Ave Maria

A, nag-aabang ng dalagang masisila

At si Nena

Di parin natitinag sa pagno-nobena

Pangpitumpung ulit na

Ave Maria, Ave Maria

Pinagdarasal na huwag positibo

Ang pregnancy test niya

Ave Maria, Ave Maria

Napupuno na ng grasya

Itong buslo ng mga sakristan

Amen.

Messia

Muling bumalot ang kahindik-hindik na pagmamani-obra ng mga bendisyon ng mga Kato(k)lisismo, mula sa planadong Messia hanggang sa alagad niyang nagpapakalat ng Pinabuting balita. Ilang dekada nang tumatanggap ng benipisyo ang mga kaparian; ilang dekada nang umuulit ang siklo ng pagpapalaganap at pambubulag; ilang dekada nang umiinit sa kamay ng simbahan ang tinangang paniniwala sa mga Santo’t espirito na patuloy na nagmumulto sa isipan ng mga tao, ang pinabanal na larawan, pinabangong pangalan,at dinakilang kapanyakan ng kanilang hinirang…

Sa “Sa Dagat na Apoy ng mga Bendita” ni Prof. Rogelio Ordoñez inilabas ng may akda ang sigaw ng rebolusyon. Sinangkutsa ang mga pinabanal na katawagang pansimbahan at hinalo sa maanghang na pag-aalsa. Dito’y nanaig ang simbolismo’t rasyunal na pagtingin, gaya ng ilan:  Ang pagluluwa sa may lasong ostiya na simbulo ng pagtanggi at pag-papalagay sa masamang dulot ng pagkain ng ganitong paniniwala; Ang pagtaas ng kalis na bungo at pagbuhos ng dugo sa santong rebulto at mukha ni kristo na maaaring pagpapakita sa  mukha ng katotohanan ukol sa pagpaplano ng mirakulo ng pagpapanggap; Pulpito ang puso ng masa gayong lubos ang panggagamit ng simbahan sa lipunan ay ba’t di naman papaghariin ang damdamin ng masang lumalaban; papagkumpisalin at paluhurin mga pari at mongha palabasin sa panty ng panginoon ang nagkukubling mga alagad ng pinabuting balita, sa gayon mabigyan man lamang ng hustisya ang hindi mabilang na pagkakasala ng mga ito sa bayan/ sa lipunan- ilang nobela kaya ang mabubuo sa buhay ng bawat isang kaparian; Estampita’t mga kandelabra sa altar ng dusa,butil ng rosaryo, malibag na kalmen at bibliya ng pera ang ipambabala sa nilikhang kanyon ng pakikibaka, itaboy pabalik sa kanilang mukha ang instrumentong kanilang pananggalang, na patuloy ibinambubulag sa lipunan; krus ng ubaning santo ilang libong taon ng naghihintay ang pinaasang kaluluwa, sa langit hindi malamang makita si pedrong may tangan ng susi sa pangakong mansyon sa kalangitan, pagkat naririto pa siya sa lupa, nagsasabong; ang layang kinulong ng puting demonyo  bantad ang pagbabawal ng simbahan sa simpleng kalayaang nagpapakita raw ng kaimoralan, simbahang hindi nagbabayad ng buwis, simbahang may sungay na sa politikang usapin, ang pagbabalatkayo ng mga may akda ng kaputian ay nawa’y matanggalan ng maskara nang malantad sa masa ang likas nilang bunto’t at sungay; at ang ilan pang halimbawa ng mga ginamit na simbolo sa tulang ito’y nagpapakita ng paglaban sa mahiwagang bendisyon ng pananampalataya.

Bakit hindi ang pag-aalsa? Gayong ilang libong taon na tayong minumulto ng mga anito; ng mga santo, ng mga papa’t pari sa mga kapilya’t kumbento; at matatakot nga tayo sa kaparusahan ng hindi pagsunod sa mga ito. Matatakot muli sa multong gawa-gawa rin lang ng malikhain, mapanlinlang na kaisipan… ngunit hindi mananatiling bulag ang mga tao, sasaan pa’t makikita rin ang pagbabalat kayo ng mga benduho, ng mga banal, ng mga kapariang negosyante at kriminal.

Nalunod na tayo sa kanilang taktika, at mula pagkasilang itinuturok na satin ang bakuna ng Pinabuting balita, pagbabayad natin ng utang na loob sa pagpapakilala nila sa atin ng nag-iisang Messia ay pag-iimpok naman nila ng masaganang benipisyo’t salapi sa kaban ng kanilang bilbil at bulsa. Hindi nakapagtatakang kung sa pagtatantya ay umabot ang pera ng simbahan noon sa $8,000 million, at sa kasalukuyan ay $35 billion na. napakalaking halaga para sa bansang Pilipinas na patuloy sa paghihikahos. Subalit anong gagawin ng simbahan sa salaping ito. Baka iyan na mismo ang ipambili nila ng mansyon sa langit upang ang mga kaluluwang ilang dekada ng naghihintay kay san pedrong may tangan ng manok at susi ay hindi na magdarasal ng mararahas na nota ng pakikibaka…

Librea

Libro de caja

El fuente lucrativo

Limos palmada

Limos patizambo

Por pobres

Sin casa y bobo

Sitas el un amigo

Suyo demonyo

Saludos a todos

Pueblo impokrita

Si pabor

Kuno des iglesya litanya

Tang ina, Tang ina

FLOWER DOLL

Man of taste bud took of proud
Scared of losing jewel on his box
Another page turns out without talking
After a few sentences he leave it open
Love is a bud that has a scent
That has untamed feeling inside its heart
Love at the first beat sprouts uncertain
Unless you have thorn, it is given
Never turn out after nourishing the eyes
Which always lean on the next days
-012809

INAKAY

Likidong luminis sa sikmurang kumakalam
dumadaloy sa dugo hindi na mabilang
sa tawag ng pangangailangan na gumapos sa katawan
titimbang ng higit sa kanyang pangalan

Sa ilang inakay na hindi malimliman
sa baba ng lipad dagit lang ay langgam
tuka sa kadilimang tinuka ng ilan
pakpak na ginapos ng kahirapan


Pambili ng aliw ang ibinentang aliw
sa inakay ng kalapati sa lipon ng tingting
sikmurai'y ano pang maipapakain
malibing naman ay walang maglilibing

Dagitab na ilaw sa gaserang basag
kanyang liwanag man ay aandap-andap
lubhang pasalamat sa mga bumanaag
 sa pagsapit ng dilim muling dadapo sa bitag.

-090908

EFIGY 2011

Bugok kang itlog na lumabas

Sa sinapupunan ng nagdaang rehimen

Na pinutakti ng katiwalian

Kahirapan, kurapsyon, krimen

At hindi na mabilang na anomalya

A, nagsalamin ka pa sa mata

Hindi mo naman makita

Sambayanang patuloy naghihirap

Nagdarahop, busabos, alipin at pinagsasamantalahan

Nagsalamin ka pa

Hindi mo naman makita

Na kuba na sina  Juana’t Juan

sa kakakayod

hindi naman sapat ang pasahod

lugmok parin ang bayan

sa tanikala ng paghihirap

pagkalam ng sikmura

basahang damit, tirahang barung-barong,

tagpi-tagpi, nilalangaw na kabulukan

pinagpipyestahan ng bangaw, langaw

ang kabugukan

Isinakay ka sa sasakyan ng Militar

na disenyong U.S

Waring mula pa noon

Magkasama na kayo

Sa paglalakbay

Sa tuwid na landas

Wari ika’y pinagmamaneho

Ng Imperyalitang Amerikano

Kaso, hindi na kayo
aabot pa

Sa daan niyong pinaplano

Hindi sa sobrang mahal na

ng litro ng krudo

 kundi nalalapit na

ang pagiging niyong abo. 

PAGNINIIG

Ipininta ng pagtatagpo

Ang ikaw at ako

Itinakda marahil

Ang pagiging buo

Mula ulo hanggang paa

Mula buhok hanggang kuko

Magtatali ang ugat, bituka o puso

Mag-iisang anyo

Ako ay ikaw

Ikaw ay ako

Malaya nating samyuhin

halimuyak ng isa’t isa

malayang hagkan

yakapin nang walang pangamba

malayang mong sipingan

ang aking isip

o pasukin ang panaginip

sabay nating pakinggan

impit ng ating tinig

o ng pusong kay bilis ng pintig

sabay nating lasapin

pulot na kay tamis

ang lasa ng ako ay ikaw

at ikaw ay ako

At kapwa langit lamang

Ang dulo ng pagtatagpo

Bahala na

Bahala na ang gapos
na punpon ng kalawang ang bumigay,
ang siyang magbigay ng dahilan
upang wag mawalan ng ganang muli pang huminga
kahit ang hanging pumupulupot
sa seldang ito'y alingasaw ng halo-halong amoy,
ng dugo, pawis, ihi, ng bulok na taong patay
na naaagnas na ang balat,

natutuklap ang lamang inuuod. . .


Bahala na ang kalawang ang sumira
nitong gapos na bakal. . .
'makakalaya rin kami'
-022889


Bahala na ang gapos na bakal ang magpasya
manali man sa kamay kong wala nang gana pang igalaw. . .
sa buhay kong wala ng araw -022890


Bahala na
ang media ang kumausap
sa aming mga kaanak
at magsabi, "tahimik na ang kanilang kalagayan"
-022890 11:45pm


Bahala na
ang konsensya ang pumatay sa mga naghahari, PNP
(sakaling makadaplis sa metal nilang puso)
-kung sakaling di na namin magawa ang magpatuloy. . .
-022890 11:59pm


"Mamamatay kami para mabuhay ang konsensyang papatay sa kanila"
-022809

Hangad namin ang inyong paggaling

Hangad namin ang inyong paggaling

nang ika’y amin nang makapiling

sa croma de habla

sa korte ng (in)hustisya

La Gloria!

Magpagaling ka!

Subalit La Gloria

labis kaming nangangamba

May side effect daw kasi

ang itinuturok na gamot

Maaaring makapagpapanot

Maaari daw makalimot

Kung ganoon, La Gloria

Baka mahirapan ka nang makaalala

Baka makalimutan mo na kung sino ka

Maging ang paboritong sayaw na Cha-Cha

Malilimutan mo na

Maging ang pagkaKonggresista

Sa lungsod ng Pampanga

Maging ang Jueteng Payola

Baka makalimutan mo na rin ang iyong asawa

Imbes “Hello Mike?”

Magiging “Hello Garci?” na

Makakalimot ka sa romansa

Malilito ka rin kung fertilized egg ba

O Fertilizer scam

ang nahihinog sa bahay-bata

Magtataka ka kung bakit

Nare-renew ang Marriage Contract

At hindi ang ZTE-NBN Contract

Makakalimot ka sa mga kaibigan

dating kaalyado, dating amo

Hindi mo na makikilala sila Bush, De Venecia
Esperon, Garci, Palparan at iba pa

At higit sa lahat

Baka makalimutan mo

Kaming masang pinagsamantalahan

Inabuso at pinagmalupitan

Hindi! Hindi namin kaya
La Gloria

Kaya’t magpagaling ka na

Nang matapos na

ang taktika mo

na hindi maubos-ubos  na mediko sertipiko

La Gloria

nawa’y pagalingin ka na

ng ating banal na Hesu Kristo

HILING KO'Y NANDITO KA

kung ang dilim ng pangungulila'y lumatag sa paligid

muli bang maaaninag ang tamis ng iyong paghimig

ang yakap mo’t lambing na kikitil sa panginginig

hiling ko'y nandito ka nang luha’y di na muling mangilid

Pakigapos ang kaluluwa sa panaginip ko'y gumagala

lagyang buhay kung ang hininga’y pinatid na ng pangungulila

pawiin ang pagtangis, na sa oras o minuto'y isa nang baha

dinggin nawa ang pagsigaw bago ang pintig ay mawala

Hiling ko'y wala ng araw pagka't ika'y tanging bituin

hiling ko'y lumilipad nang sa alapaap ika’y makapiling

o sa oras ay makapaglakbay nang di sayo'y nalulumbay

subalit pano pa kung layo mo’y walang sukat na taglay

Ika'y kidlat sa pusong nagpaningas sa kaluwalhatian

ang baga sa damdaming lumulusaw ng katahimikan

ikaw ang tanging dahilan, ikaw oh, tanging ikaw lamang

naway nandito ka nang hindi na naghihintay sa kawalan.

-121508

PEACE TALK

Mapanlinlang ang bunganga

ng mga sinturyon

bukod sa mabaho

Naamoy na namin

ang alingasaw ng taktika

na ikahon ang hawak naming sandata

Armalite, M-16 at iba pa.

Para ano pa?!

kung muli niyo sa aming ibebenta

At sasabihin niyong nasawata na naman

ng mga gerilya, terorista

At muling iikot ang eksena

sa rolyo ng inyong sistema

Kaya nga’t hindi kami makapapayag

na mademobilisa

Halang ang bituka

ng mga asong lobo

sa kagubatan ng mga pinagpala

baka dukutin kami isa-isa

baka traydurin ng mga sultana

kung hindi kami magsasama-sama

bubulagta na lang

ang sinumang makita

ng inyong nag-aapoy na mga mata

Hindi kami papayag

na magbalik-loob

Hindi! Hindi kailanman aanib

sa mga bahag ang buntot

Hindi! Hangga’t ang sistema

ay pinananatili niyong baluktot!

HANAY NG REBOLUSYON

Pinilit kong kalimutan

Ang hindi malimot na pag-iral

Kalawang sa puti kong blusa

Matsang pula ng ubaning panahon

Ngunit ibinabalik parin ng pagkakataon

Ang gunita ng kahapon

Sa lansangan ng kalayaan

Sa hanay ng rebolusyon

Pinilit kong kumbinsihin

Huwag nang makisangkot

Ngunit buhay ang katotohanan

Mahapdi ang pagnanaknak

ng sugat ng realidad

sa hantad na inhustisya

sa panlilinlang ng mga huwad

sa maputik na mga palad

at sa mga pasa at latay sa balat

Pinilit kong kimkimin

ang galit at pagtitimpi

ngunit lalong sumidhi ang adhikain

Umaapoy na ang kamao

Nag-aalab na ang puso

Lumiliyab na ang isipan

at hindi na mapipigilang tumupok

Kakalat ang apoy

sa puso ng mga binusabos

Lilikha ng sariling barekada

sa nagbabagang hanay ng masa

Ang sigaw,

ay hudyat ng punglo sa kalangitan

aalingawngaw ang palahaw

Hindi na matitinag, matatag

Barekadang nag-aalab

Kapit-bisig sa pagsulong

Walang umuurong!

 Walang umuurong!

Isinusulong ang pagbabago

na mula sa pagwasak

isinusulong ang pagbangon

na mula sa pagbagsak

Ibagsak! Ibagsak!

Burukrata-Kapitalismo

Propetaryo’t Asendero

Ibagsak! Ibagsak!

Pyudalismo, Pasismo, Imperyalismo

Pagbabago tungo sa pagbangon

babangon tungo sa pagbabago

Pilit mang harangan

Ang hanay, ang layon

Wala nang  dahilan upang hindi  sumulong

Rebolusyon! Rebolusyon!

-112011

PHENYLPROPANOLAMINE II

(kay jhenny)

Bumibigay na ang utak,

Hindi kaya ng Phenylpropanolamine

Ang sintomas ng ganiyang sakit

Tumulong man ang tinawag na albolaryo

Sa batis ng Croma

Pinilit lang akong ayusin

ang tila palaisipan na sudoko sa mga kamay…

Hindi ko lang malimot ang lalim ng pantheon

tuwing mapapahinto sa ganoong pagkakataon.

May nagsabi pang, “Pag nasa Roma,

Kumilos Romano ka”

Magmukha ka mang hipokrito

Na humihilik sa boses espanyolita!

Walang makapagpapagaling

Sa ganyang karamdamang masidhi ang hatid

ng pinagmulan

Maging marahil  ang ibong Adarna

na namumugad parin sa kabundukan ng Tabor

ay walang bisa ang awit na pinagpipitagan

ngunit nawa’y paniwalaan

ako’y maging tanggulan

tulutan nawang pahirin ng aking palad

ang iyong pag-ulan

 

Iniisip ko lang,

Kung muling aaliwalas ang buwan

at walang pag-alulong na magaganap

Naalala ko lang

na baka maulit ang iyong yakap,

Halik, at siil sa matamis na labi…

Iba na ang hugis ng mga ulap tuwing gabi,

Iba na ang kislap ng tala sa mutyang dalamhati,

Iba na ang kulay ng pag-iyak…

katulad  ito ng alulong ng buwan,

Tulad ng mapanglaw na kalawakan,

Tulad ng sandaigdigan

Na patuloy umiikot sa kanya-kanyang patutunguhan,

Wari’y pag-ikot mo sa aking isipan…  

-080810