Masasanay na lang ba kami ?

Dumaan kami sa matinding unos

            malakas na bagyo ang humagupit

                   sa barong-barong naming nilipad na ng hangin

                             ilang bahagi ng bubong na yero 

                   at trapal na itinali bilang dingding

at anong aasahan mong gagawin namin?

     maghintay na tumila ang ulan

     at magpakabasa na lang

         habang nilalamig, nanginginig ang katawan

     sa ginaw at sa gutom

hinugasan na rin ng putik na baha

     ilang gatang na bigas 

            di na rin masisid pa

            ilang lata na kinalawang na sardinas

di kami tatayo lang dito 

    at maghihintay ng biyaya

        ng pagtila ng ulan at paghupa ng baha

paano na ang panibagong bagyong parating?

   masasanay na lang ba kami sa baha?!

HINDI!

asahan mong mamumundok kami!